有人批評小說寫了bái 是講伊袂曉講故事，毋過小說並毋是一定 tō 咧講故事，設定背景嘛是會使變做一種小說 ê 寫法，就是 tsiah-nī-á 自由，所以歷史上有寡作家一開始寫出來 ê mi̍h-kiānn 會 hőng 當做袂曉寫。有時佮作家本身 ê 名聲嘛有關係，像 James Joyce ê Dubliners 文筆真正足好，毋過 kàu kah Ulysses 變非常恐怖，已經造成理解上 ê 障礙，koh kàu kah Finnegans Wake，完全毋知伊咧創siánn。因為伊本底 ê 名聲，後來不管伊按怎 pìnn，攏一堆人 o-ló。
寫小說無故事性 koh 名聲真大–ê 有 Jorge Luis Borges，伊上出名 ê 幾篇小說 tō 真正完全干焦背景設定niâ。按怎講都真趣味，絕對佇任何時代攏算是好小說。
翻倒頭 tńg來講，beh 編做戲劇 ê 小說當然 ài有故事，所以 tse 是另外一个層次 ê 代誌，好小說無一定會使編做好戲劇，小說佮戲劇 beh 達成–ê 是無仝 ê 目標。
歷史寫作 koh 是另外一回事，歷史寫作佮歷史小說差佇佗位咧？
歷史寫作 ê 目標是佇有限 ê 文字限制中，將複雜 ê 事件清理出一个清楚 ê 發展，予人知影前因後果，代誌本身 tsiah是重要–ê，人物 ê 個性按怎毋是重點。歷史小說除了講明代誌前後變化，閣 ài 交代人心理 ê 變化，產生戲劇感。好 ê 歷史寫作予咱知影代誌發展 ê 理路，好 ê 歷史小說予人產生歷史感。所以，定定影響社會蓋大–ê 顛倒是歷史小說，歷史寫作就算寫了真好，一般人嘛無興趣，因為 he 是咧探討事理，無像歷史小說影響情感。
嘛有人咧講「國際橋牌社」真歹看，其實伊歹看 ê 原因出佇 in 想講beh 透過戲劇來塑造台灣人 ê 歷史感，結果 kā 歷史寫作佮歷史小說（戲劇） lām作夥 leh 看，用歷史寫作 ê 方法咧做歷史戲劇，莫怪行 kah 亂去。仝時陣掠兩隻兔仔，結果是會攏掠無 oh。
原文出處 夏途島